योजनेचा उद्देश:

 महाराष्ट्रातील खुल्या प्रवर्गातील अमृतच्या लक्षित गटातील जातींतील आर्थिक दुर्बल घटकातील उमेदवारांना युवक-युवतींना संवाद, सूचना कौशल्य, सॉफ्ट स्किल, इंग्रजीसहित इतर प्रमुख भाषांवर प्रभुत्व, आत्मविश्वास वृध्दी व संगणक कौशल्य, याद्वारे व्यक्तीमत्व विकास घडवून उद्योगाभिमुख, रोजगार व स्वयंरोजगार निर्मिती करणारे प्रशिक्षण देणे.

अमृतचा लक्षगट:

महाराष्ट्रातील खुल्या प्रवर्गातील ज्या जातींना कुठल्याही स्वतंत्र शासकीय विभाग / संस्था / महामंडळामार्फत योजनांचा लाभ मिळत नाही अशा आर्थिकदृष्ट्या दुर्बल घटकांतील उमेदवार जे सदर प्रशिक्षणासाठी इच्छुक असून निर्धारित शैक्षणिक अर्हता धारण करतात असे उमेदवार

योजनेसाठी अर्ज करण्याची पध्दत:

1. या प्रशिक्षणासाठी अर्जदारांना त्यांच्या शैक्षणिक अर्हतेनुसार व आवडीनुसार अभ्यासक्रम निवडण्याची मुभा राहील. इच्छुक उमेदवारांनी अमृतच्या व संबंधित प्रशिक्षण संस्थेच्या संकेत स्थळावर ऑनलाईन अर्ज करावेत.

2. अमृतच्या योजनेसाठी इच्छुक अर्जदारांनी अमृतच्या लाभार्थी पात्रतेच्या निकषांची पूर्तता करीत असल्याची खात्री करून विहीत नमुन्यात सर्व आवश्यक कागदपत्रांसह संबंधित संस्थेच्या व अमृतच्या संकेत स्थळावर ऑनलाईन अर्ज करणे आवश्यक राहील. सदर अर्जाची हार्ड कॉपी सर्व आवश्यक कागदपत्र/दस्तऐवजसह अमृतच्या कार्यालयास विहित मुदतीत सादर करावी.

3. आवश्यक शैक्षणिक अर्हतेनुरूप प्रत्येक कोर्ससाठी पात्र उमेदवारांची निवड प्रथमत: संबंधित संस्थेकडून केली जाईल. त्यापैकी अमृत संस्थेच्या योजनेसाठी इच्छुक व लाभार्थी पात्रतेच्या निकषांची पूर्तता करीत असलेल्या अर्जदारांची यादी सदर संस्था सर्व आवश्यक कागदपत्र/दस्तऐवजसह अमृतच्या कार्यालयास मान्यतेसाठी सादर करेल.

4. अमृत संस्थेच्या छाननी समितीद्वारे सदर संस्थेकडून प्राप्त अर्जदारांच्या प्रस्तावांची छाननी करून व्यवस्थापकीय संचालक, अमृत यांचे मान्यतेने अंतिमत: निवडलेल्या लाभार्थ्यांची यादी संबंधितांना प्रशिक्षण देण्यासाठी सदर संस्थेकडे पाठविण्यात येईल.

5. याबाबत जाहीरात प्रसिध्दीनंतर योजनेच्या आर्थिक मर्यादेत संस्थेकडून प्राप्त होणाऱ्या यादीनुसार पात्र उमेदवारास प्राधान्य राहील.

लाभार्थी पात्रता निकष:

1. अर्जदाराने अमृत संस्थेच्या सर्वसाधारण लाभार्थी निकषांची पूर्तता करणे बंधनकारक आहे.

2. अर्जदार प्रशिक्षण कोर्सनिहाय संस्थांनी निर्धारित केलेली किमान शैक्षणिक / तांत्रिक पदवी / पदविका धारक असणे आवश्यक.

3. उमेदवाराचे वय १८ ते ४५ वर्षे दरम्यान असावे.

लाभार्थी निवड प्रक्रिया:

1. अर्जदार खुल्या प्रवर्गातील अमृतच्या लक्षित गटातील जातीचा तरुण/तरुणी इच्छुक नवोद्योजक असणे आवश्यक आहे.

2. अर्जदाराच्या कुटुंबाचे एकत्रित वार्षिक उत्पन्न रु. ८ लाख पेक्षा कमी असल्याबाबत प्राधिकृत अधिकारी यांचा उत्पन्नाचा वैध दाखला आवश्यक.

3. अर्जदार किमान १२ वी उत्तीर्ण असावा. (पदवीधरास प्राधान्य)

4. उमेदवाराचे वय ४५ पेक्षा जास्त नसावे.

5. अर्जदाराकडे स्वत:ची अशी नवीन व्यावसायिक कल्पना / तंत्रज्ञान असणे आवश्यक आहे.

6. उमेदवाराच्या आधार कार्ड व पॅनकार्डची स्वस्वाक्षरीत (Self-attested) प्रत.

लाभाचे स्वरूप:

1. या योजनेमध्ये लाभार्थ्यास कोणताही थेट आर्थिक लाभ अनुज्ञेय नाही.

2. कोर्ससाठी निवड झालेल्या उमेदवारांनी सदर प्रशिक्षण संस्थेच्या नियमांनुसार सुरुवातीस प्रशिक्षण शुल्क व सुरक्षा शुल्क स्वत: भरावयाचे आहे, त्यापैकी केवळ प्रशिक्षण शुल्क लाभासाठी अनुज्ञेय आहे, सुरक्षा शुल्क अनुज्ञेय नाही.

3. योजनेच्या निकषांनुसार लाभासाठी निवड केलेल्या व प्रायोजकत्व प्रदान केलेल्या उमेदवारांनी समाधानकारकरित्या कोर्स पूर्ण केल्याचे प्रमाणपत्रासह लाभार्थी यादी व प्रशिक्षण शुल्क सदर संस्थेकडून अमृतला कळविण्यात येईल.

4. लाभार्थ्यांनी प्रशिक्षण कोर्स समाधानकारकरीत्या पूर्ण केल्याचे प्रमाणपत्र संस्थेने अमृत संस्थेला सादर केल्यानंतर त्या कोर्सेसचे मर्यादेत केवळ कोर्सचे शैक्षणिक शुल्क संबंधित प्रशिक्षण संस्थेस अनुज्ञेय राहील.

अमृत सॉफ्ट स्किल व संगणक कौशल्य विकास योजना

१. अमृत संस्थेकडील योजनेच्या लाभासाठी कोणकोणती कागदपत्रे / दस्तऐवज आवश्यक आहेत?

⮚ आधार कार्ड, अधिवास प्रमाणपत्र (Domicile), उत्पन्नाचे प्रमाणपत्र / EWS प्रमाणपत्र, पदवीधर प्रमाणपत्र (Passing Certificate), शाळा सोडलेला दाखला असे आहेत.

२. या योजनेसाठी किती प्रशिक्षण मोड्यूल्स लाभार्थ्याने पूर्ण केले पाहिजेत?

⮚ या योजनेसाठी किमान पहिले दोन मोड्यूल्स प्रायोजित प्रशिक्षणार्थीस पूर्ण करणे व उत्तीर्ण होणे बंधनकारक राहील, त्यानंतरच त्यांचे लाभाचा विचार केला जाईल.

⮚ पुढचे दोन अॅडव्हान्स कोर्समोड्यूल्स पहिल्या मोड्यूल्सच्या यशस्वीतेवर अवलंबून राहतील. त्याचे पुर्णत्वा नंतर प्रशिक्षणार्थी उत्तीर्ण झाल्यावर त्यापुढील लाभ अनुज्ञेय राहील.

३. या योजनेसाठी लाभाची रक्कम किती असेल?

⮚ या योजनांतर्गत लाभार्थीस सुरुवातीस कोणताही थेट आर्थिक लाभ अनुज्ञेय नाही. कोर्स समाधानकारकरित्या पूर्ण केल्यानंतर लाभार्थीच्या प्रशिक्षणाचे केवळ शैक्षणिक शुल्क सदर संस्थेस अनुज्ञेय राहील.

⮚ शुल्क परतावा रक्कम ही संबंधित संस्थेमार्फत लाभार्थ्याचे आधार संलग्न बँक खात्यात जमा केली जाईल.

४. प्रशिक्षण कोर्सचा सविस्तर तपशील कोठे मिळेल?

⮚ संस्थेकडील प्रशिक्षण कोर्सचा सविस्तर तपशील संस्थेच्या संकेतस्थळावर उपलब्ध राहील.

५. अमृतचे लाभार्थी निकष पूर्ण करीत असलेल्या परंतु यापूर्वी सदर संस्थेत कोर्स पूर्ण केला असेल तर लाभाची रक्कम लाभार्थ्याला मिळेल का?

⮚ नाही.

६. यावर्षी योजनेचा लाभ न मिळाल्यास पुढील वर्षासाठी लाभार्थ्यांची प्रतीक्षा यादी ठेवली जाते का?

⮚ नाही.

७. असेच कोर्स दुसऱ्या एखाद्या संस्थेत केल्यास लाभ मिळेल का?

⮚ नाही.

८. निवड झालेल्या लाभार्थ्यास एका आर्थिक वर्षात अल्पकालावधीचे दोन कोर्स पूर्ण करायचे असल्यास दोन्ही कोर्ससाठी लाभ मिळेल का?

⮚ होय.

९. अर्जदारास निवड झाल्याचे कसे समजेल?

⮚ अमृतच्या www.mahaamrut.org व सदर संस्थेच्या संकेतस्थळावर लाभार्थी यादी प्रसिध्द केली जाईल.